وحشتينى

من أكبر النعم انك تعرف تكتب تعرف تفضفض مع كل الناس اللى متعرفهمش يمكن تلاقى حد يتعاطف معاك أو له نفس ظروفك أو بيتألم ومش عارف يقول مش عارف يحكى ، مش قادر يفضفض مكتوم الألم جواه زى الامراض الخبيثة الى بتنهش جواك وفى الأخر تكتشفها فجأة وقد يكون الاوان قد فات .
جواى حزن أه ، ألم أه ، قهر يمكن ، ليه كل دا لأانى بقيت لوحدى ، ايه دا فى سنك دا بتقولى كده اربعين سنة
أه اربعين سنة بشوفها بكلمها بحكيلها وبتسمعنى بتعرف اذا كنت زعلانة ومش بتحاول تقررنى بتسبنى لما اهدى ، اربعين سنة عارفانى حفظانى اتجوزت وبقالى 15 سنة ولسة جوزى ميعرفنيش زيها لسة بيحتار فى سكوتى وبينتقد كلامى وبيتخانق على حاجات تافهة هى لأ ، هى بتحن على فى ضيقى من غير ما اشتكى ، هى بتحترم خصوصياتى ،  وهى بتعلم اولادى الحب والحنية ، هى ألامان اللى انا بفتقده حاليا وبدور عليه فى كل اللى حولى مش لقياه ، رغم انها متعلمتش قوى لكنها مثقفة بتقرأ وبتسمع وبتفهم ، وبتحكى عن حياتها كأنها امبارح طيب مين حيحكى تانى بعدك مين حيقول ومين حيطبطب مين حيفرح اولادى لما ينجحوا ويجروا عليها بالشهادة الحلق فيه غصة يا أمى بعدك مش قادرة اشيلها لكن بكتب بفضفض لانى لما حكيت معاكى مردتيش على سكاتك طول قوى ومش عارفة لأمتى