يونس ولد فضة

اه لوكنت لسه عايشة يا أمى كان يعجبك يونس ولد فضه ، من زمان وأنت بتحب الصعايدة ومسلسلاتهم من ايام زئاب الجبل وغيرها ، لكن مفيش واحدة من حريمهم راح تعجبك لا ام يونس المزيفة ولا حسيبة قلوبهم جاحدة وعيونهم واسعة وبتبرق من الغل ، لكن أنت قلبك كان ابيض بيحب الخير ، يونس بيحب الخير قلبة لسه صغير زى ما كان وهو بيهرب من الخوف اللى بيطارده .
كنت قبل وفاتك وأنت بتجهزى لرمضان بتوصى أختى تقول لك على المسلسلات الحلوة ومواعيدها ،بيقولو كمان ونوس حلو بس مشفتش منه ولا حلقه ، وكمان فى الاسطورة هو حلو بس قاتم قوى كله جبروت ، والقلب مبقاش فيه مكان ، البلد كلها جبروت ومش ناقصة ، الطيبة والحنية اللى بيرسموها فيها شئ ناقص كأنها مش طالعة من القلب ،مزيفة زى التمثيل ،لكنهم اتفقوا على القوة اللى بتتسند على المال ، لازم يكون المال موجود  مش بس موجود لا كتييييييير قوى علشان يتسند عليه علشان يشترى ويبيع ويغتصب الحق اللى مش ليه ويقتل بقلب بارد ، القتل بقى كتيير قوى يا أمى بقى حقيقى مش محتاج نمثله تانى ،أما باقى المسلسلات فهى فعلا تمثيل وتمثيل سئ كمان كله نكد وخيانة وعنف ومخدرات ، وناس طيبة بتموت وتسيب الدنيا للاشرار ، على رأى المثل ( مبيقعدش على المتاود الا شر البقر )
عندك يا امى راحة وخضرة ونور ، وقلوب طيبة .